ខេត្តកំពង់ឆ្នាំង៖ នារសៀលថ្ងៃសុក្រ ១កើត ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២២ ខែឧសភា ឆ្នាំ២០២០ លោក សំ ចាន់ថន អភិបាល នៃគណៈអភិបាលស្រុកកំពង់លែង លោក ចេង ចាន់ដូណា អភិបាលរងស្រុក និងអាជ្ញាធរឃុំ ភូមិ បានចុះពិនិត្យការដ្ឋានសាងសង់ផ្លូវលំ ០១ខ្សែ មានប្រវែង ២០០ម៉ែត្រ ស្ថិតនៅក្នុងភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង។
ផ្លូវលំ០១ខ្សែ មានប្រវែង ២០០ម៉ែត្រនេះ ជាអំណោយដ៏ថ្លៃថ្លារបស់ ឯកឧត្តម ត្រាំ អុីវតឹក ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកកំពង់លែង។
បើតាមការបញ្ជាក់ឱ្យដឹងពីលោក សំ ចាន់ថន អភិបាល នៃគណៈអភិបាលស្រុកកំពង់លែង ការស្ថាបនាផ្លូវលំ ០១ខ្សែនេះសម្រេចបាន ៨០%គ្រោងនឹងបញ្ចប់គម្រោងក្នុងពេលខ្លីខាងមុខនេះ ៕
