ខេត្តស្វាយរៀង៖ នាព្រឹកថ្ងៃសៅរ៍០៤កើត ខែជេស្ឋ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៥ ខែឧសភា ឆ្នាំ២០២១ ឯកឧត្ដម តូច ប៉ូលីវ៉ា អភិបាលរង នៃគណៈអភិបាលខេត្តស្វាយរៀង តំណាងឯកឧត្តម ម៉ែន វិបុល អភិបាលខេត្ត ដោយមានការចូលរួមពី លោក កើត សារឿន ប្រធានមន្ទីរបរិស្ថានខេត្ត លោក រាណ សុវណ្ណារិទ្ធិ សមាជិកអចិន្រ្តៃយ៍ សសយក ខេត្ត ។ 
លោកនាយកវិទ្យាល័យស្វាយរៀង មន្រ្តីរាជការមន្ទីរបរិស្ថានខេត្ត លោកគ្រូ អ្នកគ្រូ វិទ្យាល័យស្វាយរៀង និងយុវជន សសយក ក្រុងស្វាយរៀង បានអញ្ជើញចូលរួមដាំកូនឈើចំនួន ១០០ដើម ដែលផ្ដល់ដោយឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន ដាំនៅក្នុងបរិវេណ វិទ្យាល័យស្វាយរៀង។ការដាំដើមឈើនេះឡើងគឺ ដើម្បីលើកម្ពស់សោភ័ណ្ឌភាព សាលា ក៏ដូចជាបណ្តុះគំនិតថែរក្សា ស្រឡាញ់ និងការពារឈើ សម្រាប់យុវជនជំនាន់ក្រោយៗបាន ស្គាល់នឹងពីតម្លៃនៃដើមឈើ។
ក្នុងឱកាសនោះដែរ ឯកឧត្តម ក៏បានជម្រាបជូនដល់លោកគ្រូ/អ្នកគ្រូ ត្រូវចូលរួមថែរក្សា ការពារ ស្រោចទឹក និង ដាក់ជី កូនឈើទាំងនេះឱ្យបានទៀងទាត់ ដើម្បីឆាប់លូតលាស់ បានផ្លែផ្កា ជាប្រយោជន៍រួមដល់សាលា ក៏ដូចជាកូនៗ ក្មួយៗជំនាន់ក្រោយជាសិស្សានុសិស្ស បានស្គាល់អំពីប្រភេទដើមឈើផងដែរ។ លើសពីនេះ ឯកឧត្តម ក៏បានណែនាំឱ្យចូលរួមអនុវត្តអោយបានខ្ចាប់ខ្ជួននៅវិធានការ៣កុំ ៣ការពារ ដើម្បីរួមចំណែកទប់ស្កាត់ការរីករាលនៃជំងឺកូវីដ-១៩៕
