(កំពង់ស្ពឺ ) នាព្រឹកថៃ្ងសុក្រ ទី១៧ ខែកក្កដា ឆ្នាំ២០២០ នៅសាលប្រជុំរដ្ឋបាលស្រុកភ្នំស្រួច មានរៀបចំពិធីផ្ទេរ-តែងតាំងមុខតំណែង និងបំពាក់ឋានន្ដរស័ក្ក ជូនមន្រ្ដីកងកម្លាំងនគរបាលចំណុះអធិការដ្ឋាននគរបាលស្រុកភ្នំស្រួច ។
អញ្ជើញជាអធិបតីភាពក្នុងពិធី ប្រកាសផ្ទេរភារកិច្ច តែងតាំងមុខតំណែង ពីរសំណាក់លោកឧត្តមសេនីយ៍ត្រី តាប់ លន ស្នងការរង លោកឧត្តមសេនីយ៍ត្រី ប៊ុន ចាន់ថា ស្នងការរង តំណាងលោកឧត្តមសេនីយ៍ទោ សម សាមួន ស្នងការ នគរបាលខេត្ដកំពង់ស្ពឺ និងមានការចូលរួមពីរលោកអធិការនគរបាល លោកអធិការរង លោកនាយផ្នែក-នាយរងផ្នែក លោកនាយប៉ុស្ដិ៍នគរបាលរដ្ឋបាលទាំង១២ ។
មានប្រសាសន៍ក្នុងពិធីប្រកាសផ្ទេរភារកិច្ចតែងតាំងមុខតំណែង និងបំពាក់ឋានន្តរស័ក្តិ លោកឧត្តមសេនីយ៍ត្រី តាប់ លន បានពាំនាំការផ្តាំផ្ញើសាកសួរសុខទុក្ខពីសំណាក់លោកស្នងការ នគរបាលខេត្ដ ចំពោះកងកម្លាំងនគរបាលទាំងអស់ ត្រូវរួមគ្នាបន្ដខិតខំបំពេញការងារតាមជំនាញរៀងៗ
ខ្លួន និងសូមកោតសរសើរ ដល់មន្ត្រីកងកម្លាំងនគរបាលគ្រប់ផ្នែក ប៉ុស្តិ៍ ដែលបានខិតខំសម្រេចបានសមិទ្ធផលជាច្រើនក្នុងការរក្សាសន្តិសុខ សុវត្ថិភាព សណ្តាប់ធ្នាប់ជូនប្រជាពលរដ្ឋ ។
និងត្រូវមានឥរិយាបទទន់ភ្លន់ផ្តល់សេវាសាធារណៈជូនប្រជាពលរដ្ឋអោយបានឆាប់រហ័ស ទាន់ពេលវេលា និងត្រូវបន្តការអនុវត្តគោលនយោបាយភូមិ-ឃុំមានសុវត្ថិភាព ដើម្បីមូលដ្ឋានគ្មានបទល្មើសលួច ឆក់ ប្លន់ គ្រឿងញៀន ព្រមទាំងកាត់បន្ថយគ្រោះថ្នាក់ចរាចរណ៍ឱ្យនៅកំរិតអប្បបរមា។
បន្ថែមពីនេះត្រូវគោរពឱ្យបានមុឺងម៉ាត់ នូវវិន័យរបស់កងកម្លាំងនគរបាលជាតិ ចេះសាមគ្គីភាព ឯកភាពផ្ទៃក្នុង ដើម្បីក្លាយខ្លួនជាមន្ត្រីគំរូ ដែលជាជំនឿជឿទុកចិត្តរបស់ប្រជាពលរដ្ឋគ្រប់ៗរូបនៅក្នុងមូលដ្ឋានផងដែរ គម្បីជៀសវាងការប្រេីអំណាចតួនាទីខុសនិងជាប់ពាក់ព័ន្ធ ជាមួយបញ្ហាផ្សេងៗ។
បន្ថែមពីនេះលោកស្នងការរងបានណែនាំឱ្យមន្ត្រីកងកម្លាំងទាំងអស់យកចិត្តទុកដាក់ថែរក្សាសុខភាព និងរក្សាអនាម័យជាប្រចាំដើម្បីបង្ការការពារជំងឺកូវីដ-១៩ តាមការណែនាំរបស់ក្រសួងសុខាភិបាល ក៏ដូចជារាជរដ្ឋាភិបាល៕
