ភ្នំពេញ៖ កម្លាំងនគរបាលខណ្ឌចំការមន ចុះបង្ក្រាបទីតាំងបើកល្បែងហ្គេមបាញ់ត្រីមួយកន្លែង ឃាត់ខ្លួនបានមនុស្សជាច្រើននាក់ និងទូហ្គេមជាច្រើនទូ។ ការបង្ក្រាបនេះបានធ្វើឡើងកាលពីវេលាម៉ោង២និង៣០នាទីរសៀល ថ្ងៃទី១៤ ខែតុលា ឆ្នាំ២០១៩ នៅចំណុចផ្ទះលេខ២៥ ផ្លូវ៩៧អា ក្នុងភូមិ៥ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
សមត្ថកិច្ចបានឲ្យដឹងថា ប្រតិបត្តិការនេះ ដឹកនាំដោយលោកវរសេនីយ៍ត្រី សៀច ឈួនស៊ីម៉ូលីន អធិការរង ខណ្ឌចំការមន រួមទាំងមានការចូលរួមពីលោកអនុសេនីយ៍ឯក ផន អូន នាយផ្នែកនគរបាលព្រហ្មទណ្ឌខណ្ឌចំការមន , លោកអនុសេនីយ៍ឯក យស់ យ៉ារ៉ា នាយផ្នែកគ្រឿងញៀន ,លោកអនុសេនីយ៍ឯក ជួន ធី នាយរងប៉ុស្តិ៍ផ្សារដើមថ្កូវ បានដឹកនាំកម្លាំងជាច្រើននាក់ ចុះបង្ក្រាបទីតាំងហ្គេមបាញ់ត្រីមួយកន្លែង ដែលបានបង្កភាពអសណ្តាប់ធ្នាប់ ពពាក់ពូនគ្នាចូលលេង យ៉ាងអាណាធិបតេយ្យ។
ជាក់ស្តែងសមត្ថកិច្ចបានធ្វើការឃាត់ខ្លួនជនសង្ស័យចំនួន៦នាក់ ក្នុងនោះមានប្រុស៣នាក់ ស្រី៣នាក់ ហើយក្នុងនោះមានស្រីម្នាក់ជាអ្នកមើលការខុសត្រូវ និងដកហូតបានទូហ្គេមបាញ់ត្រី២ទូ កៅអី៧ និងឧបករណ៍សម្រាប់ជក់គ្រឿងញៀនមួយកំផ្លេផងដែរ។
បច្ចុប្បន្នជនសង្ស័យនិងវត្ថុតាង ត្រូវបានសមត្ថកិច្ចធ្វើការនាំខ្លួនមកកាន់អធិការដ្ឋាននគរបាលខណ្ឌចំការមន ដើម្បីធ្វើការសាកសួរ និងកសាងសំណុំរឿងចាត់ការតាមច្បាប់បន្តទៀត៕
