ស្រុកកៀនស្វាយ៖ នាព្រឹកថ្ងៃទី១៦ ខែតុលា ឆ្នាំ២០២៤ នៅសាលប្រជុំសាលាស្រុក លោក អ៊ូ ឈាង ប្រធានក្រុមប្រឹក្សាស្រុក រួមជាមួយលោក ឡូវ សុខសាន អភិបាល នៃគណៈអភិបាលស្រុកកៀនស្វាយ បានអញ្ជើញសំណេះសំណាលជាមួយបងប្អូនក្រុមកីឡាករទូក”ង”ទាំង១៣ទូក នៅក្នុងស្រុកកៀនស្វាយ ដែលត្រូវទៅចូលរួមអុំប្រណាំងនៅក្រុងតាខ្មៅ ខេត្តកណ្ដាល រយះពេល២(ពីរ)ថ្ងៃ នាថ្ងៃទី១៧-១៨ ខែតុលា ឆ្នាំ២០២៤ ដែលរៀបចំឡើងដោយរដ្ឋបាលខេត្តកណ្ដាល។
នាក្នុងឱកាសនេះ លោក ឡូវ សុខសាន អភិបាលស្រុក បានណែនាំ និងផ្តាំផ្ញើរដល់ប្អូនចំណុះទូកទាំងអស់ត្រូវខិតខំប្រឹងប្រែងក្នុងការអុំប្រណាំង ដោយស្មារតីសាមគ្គីភាព យោគយល់អធ្យាស្រ័យគ្នា និងគោរពវិន័យតាមគណៈកម្មការរៀបចំការប្រណាំងទូកខេត្ត ព្រមទាំងត្រូវចូលក្នុងការថែរក្សាបរិស្ថាន និងអនាម័យនៅកន្លែងស្នាក់នៅឱ្យបានល្អប្រសើរ។
ដើម្បីលើកទឹកចិត្តដល់បងប្អូនចំណុះទូកទាំងអស់ រដ្ឋបាលស្រុក បានឧបត្ថម្ភដល់ទូកខ្នាតអន្តរជាតិចំនួន៥ទូក ក្នុងមួយទូកទទួលបាន ថវិកា ២៥០ ០០០រៀល អង្ករ ៥០ គីឡូក្រាម ភេសជ្ជៈ ៥កេស និងទឹកសុទ្ធ ២៥យួរ ទូកវែងចំនួន ៨ទូក ក្នុងមួយទូកទទួលបាន អង្ករ ១០០ គីឡូក្រាម ភេសជ្ជៈ ១០កេស ទឹកសុទ្ធ ៥០យួរ និងថវិកា ៥០០ ០០០រៀល។
