(ខេត្តកែប)៖ លោក កែន សត្ថា អភិបាលខេត្តកែប និងជាប្រធានគណៈកម្មាធិការគណបក្សប្រជាជនកម្ពុជាខេត្តកែប បានរៀបចំពិធីហូបនំបញ្ចុកសាមគ្គីនៅគ្រប់មូលដ្ឋានទូទាំងខេត្តកែប ដែលមានឈ្មោះថា”នំបញ្ចុកតេជោសន្តិភាព” ដែលពិធីនេះត្រូវបានធ្វើឡើងនៅគ្រប់មូលដ្ឋាន នាព្រឹកថ្ងៃទី០៩ ខែមិថុនា ឆ្នាំ២០១៩ ដើម្បីបញ្ជាក់ពីការសាមគ្គីភាព និងឯកភាពជាតិ ក្រោមដំបូលនៃសុខ សន្តិភាព។
ក្នុងទិវាហូបនំបញ្ចុកនេះ លោក កែន សត្ថា ប្រធានគណៈកម្មាធិការគណបក្សប្រជាជនកម្ពុជាខេត្តកែប ក៏បានដឹកនាំសហការី សមាជិក សមាជិកា ក្រុមការងារគ្រប់លំដាប់ថ្នាក់ និងប្រជាពលរដ្ឋគ្រប់មូលដ្ឋានឱ្យចូលរួមពិសារនំបញ្ចុករួមគ្នា ដើម្បីបញ្ជាក់ពីការសាមគ្គីភាពយ៉ាងស្អិតល្មួត ដោយកម្មវិធីត្រូវបានប្រព្រឹត្តទៅនៅគ្រប់មូលដ្ឋាន ចាប់ពីព្រឹករហូតដល់ពេលល្ងាច។
ជាមួយគ្នានេះមហាជន ប្រជាពលរដ្ឋគ្រប់មជ្ឈដ្ឋាន លោកគ្រូ អ្នកគ្រូ សិស្សានុសិស្ស និងព្រះសង្ឃ ក៏បានចូលរួមយ៉ាងផុលផុស ពោរពេញទៅដោយក្តីរីករាយឥតឧបមា ដោយបានចូលរួមក្នុងទិវាហូបនំបញ្ចុកសាមគ្គី៩មិថុនាយ៉ាងសប្បាយរីករាយក្រៃលែង។
ក្នុងទិវាដ៏វិសេសវិសាលនេះដែរ លោក កែន សត្ថា ប្រធានគណៈកម្មការគណបក្សខេត្ត ពិតជាមានក្តីរំភើបរីករាយ ខណៈបានឃើញវត្តមាន សមាជិក សមាជិកា ក្រុមការងារគ្រប់ជាន់ថ្នាក់ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋតាមតំបន់និមួយៗ បានសហការគ្នាបានល្អក្នុងដែនសមត្ថកិច្ចរបស់ខ្លួន ក្នុងការរៀបចំទិវានំបញ្ចុកតេជោសន្តិភាព នេះឡើងប្រកបដោយឆន្ទៈស្រលាញ់រាប់អានគ្នា ការយោគយល់គ្នា ក្នុងស្មារតីសាមគ្គីភាព និងឯកភាពជាតិ។
សូមជម្រាបថា៖ ទិវានំបញ្ចុក៩មិថុនា របស់សម្តេចតេជោសន្តិភាព ត្រូវបានប្រធានគណៈកម្មការគណបក្សប្រជាជនខេត្តកែប លោក កែន សត្ថា រៀបចំឡើងក្នុងភាពអធិកអធម នៅគ្រប់មូលដ្ឋាន ដែលមានសមាជិក សមាជិកា និងប្រជាពលរដ្ឋចូលរួមប្រមាណជាង៣០០០នាក់៕
