ភ្នំពេញ: បុរសស្បែកខ្មៅជនជាតិបរទេសម្នាក់ជិះម៉ូតូឌុបនារីម្នាក់ជាសង្សារឆ្លងផ្លូវមិនប្រយ័ត្នត្រូវម៉ូតូមួយគ្រឿងទៀតបុកពេញទំហឹងបណ្ដាលឲ្យរងរបួសសងខាងធ្ងន់ស្រាលប្រុសស្រី ២ នាក់បន្ទាប់មកអ្នកសារព័ត៌មានចុះមកដល់កន្លែងកើតហេតុធ្វើការឡាយផ្ទាល់និងផ្តិតយករូបភាពស្រាប់តែបុរសជើងខ្លាំងរូបនេោះបានជេរប្រមាថកាតទានអង្អុលមុខនិងបម្រុងវាយអ្នកសារព័ត៌មានទៀត។
ហេតុការណ៍បង្កឲ្យកាលភ្ញាក់ផ្អើលនេះកើតឡើងកាលពីវេលាម៉ោង១២យប់រំលងអាធ្រាត្រឈានចូលថ្ងៃទី១ ខែកក្កដាឆ្នាំ២០២០នៅចំណុចមុខខារ៉ាអូខេផាត់ធីវើល(អតីតខារ៉ាអូខេញូស្តារ)តាមបណ្ដោយផ្លូវ ២៧១កែងនិង១០B ក្នុងសង្កាត់ទឹកថ្លា ខណ្ឌសែនសុខរាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឱ្យដឹងថាមុនកើតហេតុគេឃើញបុរសស្បែកខ្មៅជាតិបរទេសម្នាក់រួមដំណើរនឹងនារីជាសង្សារបានជិះម៉ូតូមួយគ្រឿងពណ៌ខ្មៅពាក់ស្លាកលេខភ្នំពេញ1IC-4234ធ្វើដំណើរតាមបណ្ដោយផ្លូវ ១០Bទិសដៅពីលិចទៅកើតលុះមកដល់ចំណុចកើតហេតុខាងលើកែងនឹងផ្លូវ២៧១ក៏មានម៉ូតូមួយគ្រឿងម៉ាកហុងដាស្កុបពីពណ៌សពាក់ស្លាកលេខ1GM-5036ជិះដោយបុរសម្នាក់ធ្វើដំណើរតាមដងផ្លូវ២៧១ទិសដៅពីជើងទៅត្បូងចាប់ហ្វ្រាំងមិនទាន់ជ្រុលទៅបុកគ្នាពេញទំហឹងបណ្ដាលឲ្យភាគីម៉ូតូស្គុបពីរងរបួសធ្ងន់ចំណែកខាងភាគីម៉ូតូម្ខាងទៀតជានារីដែលរួមដំណើរជាមួយបុរសជនជាតិបរទេសរងរបួសជើងម្ខាង។ភ្លាមៗនោះរថយន្តសង្គ្រោះបន្ទាន់បានមកដឹក
ជនរងគ្រោះខាងភាគីម៉ូតូស្គុបពីយកទៅសង្គ្រោះនៅឯមន្ទីរពេទ្យភ្លាមៗ។បន្ទាប់មកក៏មានកម្លាំងសមត្ថកិច្ចមូលដ្ឋាននិងអ្នកសារព័ត៌មានជាច្រើនស្ថាប័នចុះមកធ្វើការឡាយផ្ទាល់ក៏ដូចជាផ្តិតយករូបភាពតែត្រូវបុរសស្បែកខ្មៅជនជាតិបរទេសម្នាក់នោះបានស្ទុះទៅចាប់ទូរស័ព្ទអ្នកសារព័ត៌មាននឹងចង្អុលមុខហើយជេរប្រមាថកាតទានមកលើអ្នកសារព័ត៌មានយ៉ាងចាស់ដៃ។បន្ទាប់មកអ្នកសារព័ត៌មានជាច្រើនស្ថាប័នក៏មិនធ្វើការតបតជាមួយបុរសស្បែកខ្មៅជនជាតិបរទេសនោះដែរ។ក្រោយកើតហេតុសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយកម៉ូតូទាំងពីរគ្រឿងទៅរក្សាទុកនៅអធិការនគរបាលខណ្ឌសែនសុខរងចាំធ្វើការដោះស្រាយគ្នានៅពេលក្រោយ៕ 
