(ខេត្តកំពត)៖ នៅថ្ងៃដំបូងនៃយុទ្ធនាការឃោសនាបោះឆ្នោតសម្រាប់ការបោះឆ្នោតអសាកលឆ្នាំ២០១៩ ដើម្បីជ្រើសរើសក្រុមប្រឹក្សាខេត្ត ក្រុមប្រឹក្សាក្រុងក្រុមប្រឹក្សាស្រុក អណត្តិទី៣នេះ នារសៀលថ្ងៃទី ១៧ ខែឧសភា ឆ្នាំ២០១៩ លោកបណ្ឌិត ប៉ែន ស៉ីម៉ន សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជាថ្នាក់កណ្ដាលចុះជួយខេត្តកំពត បានអញ្ជើញជួបសំណេះសំណាលជាមួយអង្គបោះឆ្នោតជាក្រុមប្រឹក្សាឃុំ សង្កាត់ មកពីក្រុងកំពត និងស្រុកទឹកឈូ ចំនួនសរុប ១២៥នាក់។
ពិធីនេះក៏មានការអញ្ជើញចូលរួមជាកិត្តិយស ពីសំណាក់ លោក ជាវ តាយ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជាខេត្តកំពត ព្រមទាំងលោក លោកស្រី ជាអនុប្រធាន និងសមាជិក សមាជិកាក្រុមការងារគណបក្សថ្នាក់កណ្តាល ថ្នាក់ខេត្ត ថ្នាក់ ក្រុង ស្រុក ប្រមាណ ៣៥០នាក់ផងដែរ។
មានមតិសំណេះសំណាលនាឱកាសនោះ លោកបណ្ឌិត ប៉ែន ស៊ីម៉ន បានណែនាំដល់អង្គបោះឆ្នោតទាំងពីរស្រុកឲ្យយកចិត្តទុកដាក់ និងបោះឆ្នោតជូនគណបក្សប្រជាជនកម្ពុជាតាមលំដាប់លេខរៀងក្នុងសន្លឹកឆ្នោត។ លោកបណ្ឌិតក៏បានរម្លឹកពីផលវិបាកនៃសង្គ្រាម ដែលធ្វេីឲ្យប្រទេសកម្ពុជាយេីងស្ទេីតែបាត់បង់ទាំងស្រុងនូវការអភិវឌ្ឍ និងហេដ្ឋារចនាសម្ព័ន្ធនានា។
លោកបណ្ឌិតបានបន្ថែមថា ពេលនេះប្រទេសជាតិយេីងកំពុងតែសប្បាយរីករាយជាមួយសុខសន្តិភាព ការអភិវឌ្ឍ ដូច្នេះយេីងទាំងអស់គ្នាត្រូវតែរួមគ្នាថែរក្សាឲ្យបានស្ថិតស្ថេរគង់វង្ស៕
