(ខេត្តកំពត)៖ នៅរសៀល ថ្ងៃចន្ទ ៣កើត ខែពិសាខ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃទី០៦ ខែឧសភា ឆ្នាំ២០១៩ នៅសាលសន្និសីទខេត្តកំពត លោក ជាវ តាយ អភិបាលនៃគណៈអភិបាលខេត្តកំពត បានអញ្ជើញ ចូលរួមក្នុងកិច្ចប្រជុំបូកសរុបលទ្ធផលការងាររយៈពេល២ខែ កន្លងមក និងលើកទិសដៅបន្ត របស់ក្រុមការងារថ្នាក់ជាតិចុះមូលដ្ឋាន ដើម្បីត្រួតពិនិត្យ និងការអនុវត្តគាំទ្រគោលនយោបាយ និងយុទ្ឋសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា នៅខេត្តកំពត ក្រោមអធិបតីភាព លោកកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម និងជាប្រធានក្រុមការងារថ្នាក់ជាតិចុះមូលដ្ឋានខេត្តកំពត។
ក្នុងឱកាសនោះ លោក ជាវ តាយ អភិបាលខេត្តកំពត បានគូសបញ្ជាក់ថា កន្លងមកសកម្មភាពរបស់ក្រុមការងារពិតជាសម្រេចបានតាមអង្គវេទិកាសាធារណៈ មានភាពល្អប្រសើរ ហើយបញ្ហាប្រឈមដែលនៅសេសសល់មួយចំនួន គឺក្រុមការងារបាននិងកំពុងដោះស្រាយដោយច្បាស់លាស់និងឆាប់រហ័ស ប្រកបដោយប្រសិទ្ធភាពទៀតផង។
ជាមួយនេះ លោកកិត្តិសេដ្ឋា ចម ប្រសិទ្ធ បានវាយតម្លៃខ្ពស់និងកោតសរសើរចំពោះលទ្ធផលការងារស្តែងចេញពីការខិតខំបំពេញភារកិច្ចរបស់ថ្នាក់ដឹកនាំនៃក្រុមការងារទាំងថ្នាក់ជាតិ ថ្នាក់ខេត្ត ក្រុង ស្រុក គ្រប់លំដាប់ថ្នាក់ដែលបានចុះបំពេញការងារបានយ៉ាងល្អប្រសើរ។
លើសពីនេះ លោកទេសរដ្ឋមន្ត្រី ក៏បានចាត់ទុកអង្គវេទិកាសាធារណៈរបស់រាជរដ្ឋាភិបាលនៅតែមានសារសំខាន់ក្នុងការផ្សព្វផ្សាយស្តីពីគោលនយោបាយនានារបស់រាជរដ្ឋភិបាល និងដើម្បីឆ្លើយតបដោះស្រាយសំណូមពរ ក្តីកង្វល់និងបញ្ហាប្រឈមទាំងឡាយប្រកបដោយប្រសិទ្ធភាព សំដៅជួយកាត់បន្ថយភាពក្រីក្រជូនប្រជាពលរដ្ឋនៅគ្រប់មូលដ្ឋាន។
សូមជម្រាបថា៖ ក្នុងកិច្ចប្រជុំនេះ ក៏មានការអញ្ជើញចូលរួម ពីលោក លោកស្រី ក្រុមការងារថ្នាក់ជាតិ សរុប២១៥នាក់ ស្រី៣០នាក់ និងលោក លោកស្រី ជាក្រុមការងារខេត្ត ក្រុង ស្រុក មេឃុំ ចៅសង្កាត់ សរុប១០៧នាក់ ស្រី០៩នាក់ផងដែរ៕
