ស្វាយរៀងៈ អ្នកញៀនល្បែងភ្នាល់ជល់មាន់តាមអនឡាញ ជាច្រើននាក់ បានមកពពាក់ពពូនគ្នា ភ្នាល់ជល់មាន់តាមទូរទស្សន៍នៅក្នុងហាងកាហ្វេ អត់យីហោមួយកន្លែងនៅចំណុចខាងក្រោយសាលាសង្កាត់ច្រកម្ទេស ចម្ងាយជាង១០០ម៉ែត្រស្ថិតនៅភូមិទួលអំពឹល សង្កាត់ច្រកម្ទេស ក្រុងបាវិត។ 
សមត្ថកិច្ច នគរបាលប៉ុស្ត៍រដ្ឋបាលសង្កាត់ច្រកម្ទេសបានឲ្យដឹងថា ម្ចាស់ហាងកាហ្វេលួចបើក ល្បែងភ្នាល់ជល់មាន់តាមអនឡាញ ឲ្យភ្ញៀវចូលភ្នាល់គ្នា នេះឈ្មោះ ភិន រដ្ឋា ភេទប្រុស អាយុ៤៦ឆ្នាំ មានទីលំនៅកន្លែងកើតហេតុខាងលើ បានបើកល្បែងភ្នាល់ជល់មាន់តាមអនឡាញ ជ្រកក្រោម ហាងកាហ្វេ។
ស្ត្រីម្នាក់សុំមិនបញ្ចេញឈ្មោះ បានឲ្យអ្នកសារព័ត៌មានដឹងថា ល្បែងភ្នាល់ជល់មាន់ តាមអនឡាញ ក្រោមស្លាក ហាងកាហ្វេម្លប់ជ្រៃនេះ គឺបានបើកលេងយូឆ្នាំមកហើយ។ ប្រភពបន្តទៀតថា ប្តីរបស់គាត់ គឺញៀនល្បែងភ្នាល់ជល់មាន់តាមអនឡាញ នេះគឺរាល់ថ្ងៃឲ្យតែម៉ោង២រសៀល គឺចេញពីផ្ទះហើយ ដោយប្រាប់ថា ទៅផឹកកាហ្វេ ដោយផឹកកាហ្វេ ចាប់ពីម៉ោង២រសៀលដល់ម៉ោង៥ល្ងាច ការពិតគឺទៅលេងល្បែងភ្នាល់ជល់មាន់នៅក្នុងហាងកាហ្វេសោះ។ ហើយពេលណា ចាញ់ល្បែងអស់លុយ គឺសួរនាំមិនបានទេ ធ្វើមុខយក្ស រករឿង ជេបញ្ចោរ ប្រពន្ធកូន និងប្រើអំពើហិង្សា លើប្រពន្ធកូនក៏មាន។
ចំណែកអ្នករស់នៅជិតហាងកាហ្វេនោះវិញបានប្រាប់ឲ្យដឹងថា នៅថ្ងៃសៅរ៍ និងថ្ងៃអាទិត្យ គឺមានអ្នកមកលេងល្បែងម្នាល់ជល់មាន់តាមអនឡាញនេះ មិនតិចជាង៥០នាក់ ទៅ៦០នាក់ ចាក់ភ្នាល់គ្នា ហ៊ោ ក្រេវៗ គ្មានខ្លាច ញញើតសមត្ថកិច្ចឡើយ ឮគេបង្ហើបឲ្យដឹងថា មានខ្នងធំណាស់ ទើបគេមិនខ្លាចញញើតសមត្ថកិច្ចអាជ្ញាធរបែបនេះ។ទាក់ទិនករណីខាងលើ លោក ហួត សាម៉ៃ ចៅសង្កាត់ច្រកម្ទេស បានឲ្យដឹងថា ពិតជាមានករណីបើកល្បែងភ្នាល់ជល់មាន់តាមអនឡាញពិតមែន អាជ្ញាធរសង្កាត់ធ្លាប់បាន ឲ្យលោកចៅសង្កាត់រងទី២ ដឹកនាំកម្លាំងសមត្ថកិច្ចនគបាលប៉ុស្ត៍រដ្ឋបាលសង្កាត់ច្រកម្ទេសចុះទៅធ្វើកិច្ចសន្យា ឈប់ឲ្យបើកល្បែងភ្នាល់ជល់មាន់ទៀត និងមិនអនុញ្ញាតិឲ្យបើកទទួលភ្ញៀវចូលលេងល្បែងភ្នាល់ឬ ជួបជុំផឹកកាហ្វេ មានគ្នាច្រើន ឲ្យចូលរួមអនុវត្តវិធានការរបស់ក្រសួងសុខាភិបាលរក្សាគម្លាត ក៏ប៉ុន្តែជនខាងលើមិនគោរពតាមថែមទាំងផ្គើន បន្ទាប់មកលោអភិបាលរងក្រុងបាវិតមួយរូបបានដឹកនាំកម្លាំងសមត្ថកិច្ចចុះទៅហាមឃាត់ និងធ្វើកិច្ចសន្យាជាលើកទី២ ឲ្យចូលរួមអនុវត្តវិធានការ៣កុំ ៣ការពារ របស់សម្តេចតេជោហ៊ុនសែន ក្នុងការទប់ស្កាត់ការឆ្លងរាលដាលជម្ងឺកូវីដ ទៅសហគន៍ ក៏ប៉ុន្តែ ជននេះដូចជា មិនគោរពតាមកិច្ចសន្យាសោះ។
ទាក់ទិនករណីនេះដែរ ឈ្មោះភិន រដ្ឋា ម្ចាស់ហាងកាហ្វេ បានឲ្យដឹងថា ខ្លួនបើកលក់តែកាហ្វេទេ ក៏ប៉ុន្តែ ភ្ញៀវ បានសុំឲ្យបើកទូរទស្សន៍ មើលមាន់ជល់ ទើបតម្រូវតាមភ្ញៀវ ហើយភ្ញៀវគេភ្នាល់គ្នា ដាក់លុយ ស៊ីសងគ្នាគេ ខ្លួនមិនហ៊ានហាមឃាត់ទេ។ ទាក់ទិនករណីនេះដែរ អ្នកធ្លាប់ញៀនល្បែងភ្នាល់ជល់មាន់ ម្នាក់បានបង្ហើបឲ្យដឹងថា អ្នកលេងធំ គឺចាប់ពី៥ម៉ឺនរៀលទៅ២០ម៉ឺនរៀល បើអ្នកចាក់ជាដុល្លារ គឺចាប់ពី៥០ដុល្លារដល់១០០ដុល្លារក្នុងមួយគូៗ ចំណែកគាត់ធ្លាប់ចាញ់អស់ម៉ូតូ ម្តងមកហើយចាក់ក្នុងមួយល្ងាចនៅហាងកាហ្វេនេះនេះ លោកកើតសារ៉េន នាយប៉ុស្ត៍រដ្ឋបាលសង្កាត់ច្រកម្ទេសបានឲ្យដឹងទៀតថា លោកបានចុះទៅអប់រំ ឲ្យឈប់បើកឲ្យភ្ញៀវចូលផឹកកាហ្វេច្រើនជុំគ្នា ត្រូវរក្សាគម្លាត បើយកល្អសូមឲ្យភ្ញៀវច្រកយកទៅផ្ទះ តែម្ចាស់ហាងខាងលើមិនអនុវត្ត បែរជាលួចបង្កប់ល្បែងជល់មាន់ទៀត លោក និងសុំគោលការណ៍ទៅលោកចៅសង្កាត់ និងលោកអធិការ ដើម្បីមានចំណាត់ការ។លោក ហែម សុវណ្ណារិទ្ធិ អធិការ នគបាលក្រុងបាវិតបានមានប្រសាសន៍ប្រាប់ក្រុមអ្នកសារព័ត៌ឲ្យដឹងថា ចាំលោកចាត់កម្លាំងប៉ុស្ត៍រដ្ឋបាលចុះទៅអប់រំណែនាំ បើមិនគោរពតាមការណែនាំ និងសេចជូនដំណឹងរបស់រដ្ឋបាលខេត្តលោកនឹងចុះបង្ក្រាបតែម្តង។ លោកអធិការបន្តទៀតថា ក្នុងមួយរយៈពេលនេះលោកមានការមមារញឹកក្នុងការចុះស្រាវជ្រាវ អ្នកវិជ្ជមានកូវីដ១៩ និងអ្នកប៉ះពាល់ផ្ទាល់ និងប្រយោល យកទៅធ្វើចត្តាឡីសក័ ដើម្បីទប់ស្កាត់ការឆ្លងរីករាលដាលកូវីដ១៩ ទើបមានអ្នកឆ្លៀតឱកាសប្រព្រឹត្តបទល្មើសបែបនេះ។
