(ត្បូងឃ្មុំ)៖ លោក វង សូត សមាជិកគណៈកម្មាធិការកណ្តាល និងជាប្រធានក្រុមការងារចុះជួយស្រុកពញាក្រែក ខេត្តត្បូងឃ្មុំ បានអញ្ជើញជួបសំណេះសំណាល និងទទួលទាននំបញ្ចុកសាមគ្គីជាតិ ជាមួយសមាជិកក្រុមការងារថ្នាក់កណ្តាល ថ្នាក់ខេត្ត ស្រុកចុះជួយឃុំ ក្រុម ប្រឹក្សាឃុំ មន្ត្រីរាជការ អាជ្ញាធរមូលដ្ឋានគ្រប់ជាន់ថ្នាក់ លោកគ្រូ អ្នកគ្រូ ប្រជាការពារ និងប្រជាពលរដ្ឋយ៉ាង អធិកអធមក្រៃលែង នាថ្ងៃទី៩ ខែមិថុនា ឆ្នាំ២០១៩នេះ ប្រកបដោយបរិយាកាសរីករាយ និងស្និទ្ធស្នាលបំផុត។
ការទទួលទាននំបញ្ចុកសាមគ្គីជាតិ ដែលជាការដាក់ចេញដោយប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ជាមួយនឹងសមាជិកសមាជិកាគណបក្សប្រជាជនកម្ពុជា និងប្រជាពលរដ្ឋទូទាំងប្រទេស។
លោក វង សូត ក្នុងឱកាសនោះពាំនាំនូវប្រសាសន៍អំពាវនាវពីសំណាក់សម្តេចតេជោ ហ៊ុន សែន ចំពោះពលរដ្ឋទូទាំងប្រទេសទាំងអស់ ពិសារនំបញ្ចុកសាមគ្គីជាតិដោយភាពសប្បាយរីករាយ និងពង្រឹងស្មារតីរួបរួមស្នេហាជាតិ សាមគ្គីជាធ្លុងមួយទូទាំងប្រទេស ក្នុងនាមជាឈាមជ័រខ្មែរតែមួយ។
សូមជម្រាបថា ក្នុងពិធីចែកសញ្ញាបត្រដល់និស្សិតសាកលវិទ្យាល័យភូមិន្ទភ្នំពេញ កាលពីថ្ងៃទី០៣ ខែមិថុនា ឆ្នាំ២០១៩ សម្តេចតេជោ ហ៊ុន សែន ណែនាំដល់សមាជិក សមាជិកា គណបក្សប្រជាជនកម្ពុជាទាំងអស់ ព្រមទាំងប្រជាពលរដ្ឋទាំងអស់ រួមគ្នារៀបចំកម្មវិធីហូបនំបញ្ចុក នៅថ្ងៃទី០៩ ខែមិថុនានេះ៕
